2022 թվականի միջնամասից սկսած Հայաստանի տեղեկատվական տեխնոլոգիաների ոլորտը բախվեց երկու խնդրի՝ համաշխարհային ռեցեսիային և դրամի արժևորմանը արտարժույթի նկատմամբ: Այս մասին հայտնում է «Սթեփ Քընսալթինգ » խորհրդատվական ընկերության տնօրեն Սերգեյ Մուրադյանը։

 

Մի շարք դիտարկումներից և քննարկումներից հետո, 2022 թվականի դեկտեմբերին Կառավարությունը որոշում կայացրեց աջակցել ՏՏ ոլորտին՝ պայմանական 10 միլիարդ դրամի չափով: Նրա խոսքով՝ Կառավարության որոշումը կարիք է զգում մի քանի բովանդակային փոփոխությունների։

 

«Նախ պետք է ՏՏ-ում այլ գործունեություն իրականացնող դասակարգչի տակ հանդես եկող տնտեսվարողները նույնպես հնարավորություն ունենան ստանալու աջակցություն:

 

Շատերը առանց կարևորություն տալու դասակարգչին (դասակարգչի ոչ ճիշտ նշումը որևէ կերպ չի ազդում վճարվող հարկերի վրա) նշել են հենց ՏՏ-ում այլ գործունեություն դասակարգիչը:

 

Շրջանառության հարկ վճարողներին, նույնպես, պետք է աջակցել և հետևաբար այս տնտեսվարողներին պետք է ընդգրկել կառավարության որոշման շրջանակներում։

 

Վերոգրյալները համատարած բնույթ ունեցող խնդիրներ են, իսկ մնացածը մեր կողմից ներկայացվել է կառավարությանը՝ գրավոր առաջարկությունների տեսքով»,-նշում է Սերգեյ Մուրադյանը:

 

Նա նաև նշում է, որ հարկային արտոնություններ բաշխելիս շատ կարևոր է դրանց թիրախայնությունը և որպեսզի դրանք բովանդակային ազդեցություն ունենան աջակցության կարիք ունեցող ոլորտի վրա:

 

«Կարիք եմ տեսնում  նաև ինստիտուցիոնալ վերահսկողություն սահմանել կառավարության որոշումների և Վարչապետի հանձնարարությունների նկատմամբ՝ ապահովելով դրանց արագ և արդյունավետ կատարումը»,-ասաց կազմակերպության ղեկավարը:

13 Մարտի 2023, Երկուշաբթի | 1412